Perang Baratayudha

Perang Baratayudha

ku: Tina awiarsih

Asmarandana.

Hirup kudu pageuh jangji

lakon hirup Dewabrata

boga sumpah dina hate

sumpah suci maha dahsyat

babakti ka ramana

bagjana Prabu Sentanu

boga putra Dewabrata.

Nu kaucap dina biwir

meunang widi Sanghyang Dewa

sangkan jadi leuwih hade

ganti ngaran jadi Bhisma

pamer pada Dewa

suci, adil, luhur elmu

bakti ka Astinapura.

Kasalahan tina takdir

patepug jeung Dewi Amba

matak nyeri kana hate

Dewi Amba balilihan

ditampik hate Bhisma

nyekel jangji anu teguh

angger keukeuh dina wadat.

Kaucap dina emosi

sumpah pikeun Dewabrata

bakating ku nyeri hate

ngarasa boga wiwirang

saacan Amba tilar

sumpah nu nyieun kaduhung

pikeun Bhisma kahareupna.

pangabdian tina bakti

satia ka karajaan

sanajan sorangan bae

masih teguh nyekel wadat

kayaan geus beda

Dewabrata loba incu

pandawa oge Kurawa.

Kinanti.

Diajarkeun kabeh elmu

elmu pikeun meuseuh diri

katarima ku Pandawa

ku Kurawa beda deui

gede hate hirup bagja

keur kurawa pinuh dengki.

Hirup teu loba adigung

komo deui rasa sirik

gede hate teu jumawa

bersih tina iri dengki

pangajaran ti emangna

hirup kudu terus adil.

Diajar hirup teu jujur

iri dengki mah geus pasti

kalakuan ti Kurawa

embung hirup jujur, adil

Kurawa nyieun siasat

dibantuan ku Sangkuni.

Diayakeun judi dadu

dibantuan ku Sangkuni

siasat licik Kurawa

korbanna Dewi Drupadi

Kurawa ngabarakatak

ningali Drupadi ceurik.

Nyamur tilu belas taun

sabab Pandawa diusir

nyieun nagara Amarta

Arjuna pnggih Srikandi

hiji rasa jadi cinta

oge Bima jeung Arimbi.

Perang teu bisa diundur

Kurawa ngalicik deui

teu mikeun hakna Pandawa

teu nyumponan hiji jangji

merekeun Astinapura

henteu make jalan bersih.

Hate Bhisma teu paruguh

bingung ku ayana takdir

kasieunna kajadian

takdir teu bisa dipungkir

nyanghareupan Kurusetra

masrahkeun bela jeung pati.

Ajal Bhisma nu geus cunduk

dipentang panah Srikandi

tilarna di Kurusetra

saalam dunya careurik

Pandawa sarta Kurawa

nyaksian bari saredih.

Hiji perang nu  kaemut

pinuh joang bela pati

Baratayudha ngarana

ngajarkeun hirup nu adil

ngarti, jujur tur wiwaha

ulah sirik, iri, dengki.

***

Tina Wiarsih lahir di Bandung, 29 juni 1994 merupakan mahasiwa jurusan pendidikan bahasa Daerah di UPI angkatan 2013. Cewek cancer ini sangat menyukai hal-hal berbau cerita wayang, karena menurutnya cerita wayang sangat epik dan penuh dengan nasihat tersembunyi. Cerita Perang Baratayudha versi pupuh ini merupakan karya pertama "cerita dalam bangun PUPUH." sebelumnya dia sempat menulis beberapa puisi, cerpen dan sekarang sedang  mencoba untuk membuat sebuah novel. Karya-karya lamanya bisa ditemui di blog ini dan karya teranyarnya bisa ditemui d akun wattpadnya littlestaars.

salam,

Tina Wiarsih